إستجواب

الإسم واللقب وتاريخ ومكان الولادة والمهنة والحالة الإجتماعية
أمير التونسي،مولود نهار 6 مارس 1988 بتونس, طالب ومانيش معرس
إنت صاحب المدونة هذي

أيه متاعي...اشبيه ممنوع ؟

شيء ماهو ممنوع في بلادنا إلا ما يخل بالأمن العام

واش مدخل مدونتي في هذا الموضوع ...على هذا وقفتوني؟

شو كيفاش يحكي معايا ؟ تحب نبيلك جد والديك؟ أنا نسال وإنت تجاوب...مفهوم؟

.....

آش نية قناعاتك الدينية؟

الأديان أساطير تتوارثها الأجيال...نؤمن بالإنسان...ونقدس الحياة

الله الله ...لا دين لا ملا سي الشباب...تحبو تعملولنا ثورة في البلاد، انتفاضة رفاق الدرب الاحمر...تحبو تقومو فيها الأذان وتأسسولنا جمهورية لا دين لا قيم لا مبادئ

ما نحب نأسس شيء...شكون حكى على ثورة وانتفاضة...نقرا على روحي خاطيني...نحب نعيش مع العباد وكي العباد ...نؤمن بمبادئ و قيم إنسانية كونية...علاش وقفتوني؟ وقتاش نجم نخرج؟

مزروب سيادتك؟ مازلنا حاجتنا بيك...آش نية قناعاتك السياسية؟

آهوكا المدونة قدامك...ما عندي حتى إنتماء لأي حركة ولا لأي حزب سياسي...مواطن يحب بلادو ويغير عليها...وكهاو

تتبهنس على _بي؟ تحبني ندوان...امالا تهردت عليك يا ولد القح__...توا جاوبني دغري بلا تبهنيس ولا تبلعيط...موش عاجبك النظام؟ موش عاجبتك المسيرة متاعنا؟ تحكي على الحقوق والحريات

نحكي على الحياة ...نعطي في رأيي كمواطن على القرارات، الإنجازات، التوجهات في كل المجالات ...نعبر على إلي يظهرلي ومن جملتها قلت نحب مزيد من الحريات

تعبر على إلي يظهرلك؟ تعطي في رأيك؟ ناقص حريات سيادتك؟ علاش ما تكتبش تقرير ولا جواب للجهات المختصة كي الشيء موش عاجبك؟ علاش ما تعلمش السلطات؟ علاش تشكك بإنجازاتنا قدام إلي يسوى وإلي ما يسواش في المدونة؟

إسمو تدوين ...مجرد رأي...نمارس في حقي في التعبير على إلي يظهرلي ...ما سبيت حد ما تعديت على حد...نكتب بكل إحترام للأشخاص ...نكتب باش نفكر...باش نتحرر...باش نتنفس

يظهرلك سي الشباب ...اسمو ثلب...كذب...تشكيك...طعن...سب و اهانة اشخاص...إخلال بالأمن ...تعكير الصفو العام

موش صحيح أهوكا المدونة قدامك

تهنى تو نقراوها...في العقل...المدون المسمي روحو إكس تعرفو؟

نعرفو

آش عندك معلومات تفيدنا عليه؟

ما نعرفش حاجة كبيرة

موش قلت تعرفو؟ تتمنيك عليا... تحب نهرد جد والديك توا؟ جاوب من غير تقصيص؟

مواطن يكتب على روحو ويعبر على آرائو وأفكارو...يمارس في حريتو في التعبير, وين المشكلة؟ معرفتي به إفتراضية ....افتراضية ...على هذا وقفتوني ؟ على هذا جايبين الطامة والعامة؟ مقلقتكم تدوينات؟؟؟؟ أربعة كلمات؟


ثما نظام في البلاد

ثما حريات

هزوه... يقعد على ذمة التحقيق

موش معقول ...ما عملت شيء...موش مقبول



هزوه

كلنا فاطمة

لا لحجب المدونات

Esclave Blanche

هي لوحة فنية للرسام الفرنسي المستشرق
Jean-Jules-Antoine Lecomte du Noüy

اللوحة صور فيها الرسام مرأة عارية تمثل زوجة أحد ملوك الشرق في حمام مع بعض الرقيق من خدمها

الضوء في التصويرة جاي من وراء المرا باش يخليك تركز أساسا على بدنها ومن بعد بالشوية بالشوية تلقا روحك تثبت في كل تفاصيل اللوحة

الألوان المهيمنة على التصويرة كالأزرق والبني والأحمر تساهم باش تعطي طابع رقيق ولطيف للمشهد

في الأخر إلي ظهرلي زاد الشطر في اللوحة هو الوضع الغير عادي للمرأة العارية

الرسام صورلها يدها اليسار أطول بصفة غير عادية
وزادة قام برسم ساق زايدة وكائنها عندها 3 ساقين

ألوان

الأزرق
كلون السماء والبحار والمحيطات
هو لون الحياة


الأحمر
كلون الحب والمشاعر والأحاسيس
هو لون الجمال


الأخضر
كلون أوراق الأشجار والحقول والمراعي
هو لون الطبيعة


الأصفر
كلون الشمس والضوء والإشعاع
هو لون الأمل


البني
كلون الأرض ولحاء الشجر
هو لون الزمن


الأسود
كلون الليل والظلام والمجهول
هو لون الغموض


الأبيض
كلون الثلج والحليب والسلام
هو لون النقاء

ريحة البلاد يابا

محمد الجمّوسي : ريحة البلاد يابا



ريحة البلاد يابا...............ورد وياسمين يابا يابا
ريحة الكباد يا خويا................اغلى من العين
***
ريحة البلاد ما ألطفها............ما نشبع منها يوم
وصحيح ما يعرفها.........كان اللي عاش محروم
و رجع اليوم ارشفها..........من بعد غياب سنين
***
سلملي على الدار............وتراب بلادي الغالي
وجيبلي اخبار...............اهلي وناسي وعيالي
امتى نرجع للدار..............وتغيب دموع العين
***
سلملي على الاحباب..........الناس اللي يحبوني
واللي الدهر الغلاب...........بعدهم على عيوني
مالوحشة قلبي ذاب................وذابت العينين
***
شاهي نرجع لجبالي............للكرمة والزيتونة
نطلع للواد العالي..............ونشرب من عيونه