web 2.0

dimanche 26 juillet 2009

في قرية السنافر : إنتخابات

كان يا ما كان في حديث الزمان وحاضر العصر والاوان
قرية خيالية محاطة بالبحار وتملؤها الأنهار والوديان
تحاول أن تعيش فيها سنافر بسلام و أمان
رغم تضاؤل الآمال في وجود حرية وحقوق للإنسان


في يوم من الأيام
شهيلي و خلاء وقيفار
لا نسمة ولا حس أطيار

بابا سنفور خرج يعمل في طلة ويستفسر الأجواء في القرية


غريبة؟؟؟
آهو دار السنفورة مدهونة بالقزوردي


يزيد يقدم شوية

الكوشة
الفطايري
العطار
الحماص
...يا والله أحوال ...شكون عمل هل عملة ؟؟؟

ويزيد يمشي شوية



يشوف في سنفور قزوردي، فوشا وحكا دهن في يده، شايخ يغني...


يسلم عليك العقل
براريم براريم
يسلم عليك العقل و يقولك نبيك
براريم




يجري بابا سنفور وبكل جواجيه

ياااا ولدي ياااا ولدي ....فاش قاعد تعمل؟ (بالطبيعة بابا سنفور ما يقولش كلام قباحة)
ما تعرفش إلي قانون القرية يمنع الدهينة وزيد بها اللون الماسط ؟ ياخي القرية مسيبة هكا في الهواء الطلق تقوم و تطلع بعملة كيف هذي؟ ما تعرفش إلي يلزمك رخص باش تقوم تدهن في الديار وتلصق في تصاور فوق المحلات؟؟ ويني رخصة البلدية ... ويني رخصة المالية والباتيندة ورقم الإنخراط في السنسس...ويني رخصة الثقافة على خاطر القرية من التراث العالمي ... ويني رخصة وزارة الاعلام راك محسوب تدبر في راسك وثمة شوية مرشانا ؟؟؟؟
يا ولدي راهو مباصي الشيء إلي تعمل فيه ... باش نعملولك قضية في التجمهر في الطريق العام
التطاول على السلطة
ترويج أخبار كاذبة
تكوين جمعية غير مرخص لها
الإستحواذ على أموال عمومية
عربدة وسكر واضح في الطريق العام

بالفجعة هاك السنفور القزوردي ولا لونو أصفر...عينيه تملات بالدموع...عمرو ما شاف بابا سنفور في هل حالة

وتلمت السنافر اش قلك؟ آش قتلك؟ بابا سنفور باش يباصي السنفور القزوردي ويدكو في الحبس.



من كثرة الغصرة نطق السنفور القزوردي بصوت مبحاح
تي شبيك بابا سنفور... راهي
قريتنا تستعد للإحتفال بالإنتخابات الرئاسية المقبلة لتكون قريتنا العهد الجديد في احتفاء دائم بتاريخها متطلعة الى المستقبل بطموح كبير الى استكمال فصول الملحمة التي غدت منذ التحول أمرا واقعا وحلما مشروعا بفضل حكمة الرئيس بن علي في قراءة التاريخ واستشراف المستقبل والوعي برهانات المرحلة وتحدياتها ومقتضيات العمل على تدعيم مسارات النجاح.



ما كان من بابا سنفور كان ما رجعلو شاهد العقل وراجع موقفو كسنفور عندو صغيرات ويحب يكبرهم


آه والله نسيت جملة...يا سنفور ما ثمة حتى مشكلة وراهو القانون صريح في الموضوع هذا
واحنا بالعكس نشجعوك تنجم تدهن على روحك... واحنا إنحبو الدهانة... ويا ريت السنافر الكل تدهن كيفك...ويا ريت الناس الكل تتغرم بالدهينة كيفك... راهو احنا نشجعو مثل هذه المبادرات الفردية إلي فيها منفعة مباشرة لكل المواطنين وتساهم في الحفاظ على البيئة وحماية المحيط وطبقة الأوزون والكواكب الشمسية...و-دايور- هاو مفاتح داري تنجم تمشي وتدهن من البرة ومن الداخل كان تحب ... أنشط على روحك يا سنفور...وكان تستحق أي حاجة آني معاك




بما أن الحكايات في عالم الخرافات ما تنتهي كان بالشيخات

فقد قامت الزغاريط والتصافيق والهتافات
وشعلت الأنوار والأنبوبات والأضواء
وخرجت المشروبات والعصيرات والروزاتات
وتدهنت الديار والبيبان والمحلات
وهبطت الطبالة والزكارة والبندارة
ونادت الهتافات بالولاء والوفاء لرجل الإصلاح والبناء



11 commentaires:

Anonyme a dit…

و حـكـايـتـنـا هـابـا هـابـا و كـلّ عـام تـجـيـنـا صـابـة ...

!!!! و سـنـفـروا بـحـيـاتـكـم

لاعب النرد a dit…

هههههههه...ـ
" بفضل حكمة الرئيس بن علي..." ما تقوليش بن علي هذا راهو متع السنافر ههههههه
على فكرة راهم يدهنوا عندهم اش و عشرين سنة...ـ

Big Trap Boy a dit…

حلوة برشة القصّة ههههه

ذكّرتني بحكاية شفتها تشبه لهاذي أما نسيت في أما برّ

Dovitch a dit…

أهلا بكم ...كل عام واحنا فرحانين و بالقزوردي مدهونٍين والسنافر ديما شايخين...الحكاية استنبطتها من سكاتش متاع مسرحية كلام الليل يا بيغ

Khanouff a dit…

Merci :)
Khanouff

Dovitch a dit…

Ahla Khanouff
De rien, c'est toujours un plaisir de jouer avec les Schtroumpfs/Sanafir :)

عياش مالمرسى a dit…

A quand les Shtroumpfs révolutionnaires??? =)

Dovitch a dit…

Excellente idée Ayech, je vais réfléchir a un scénario dans ce sens.

Anonyme a dit…

b'sara7a; tayyara barcha el 7kaya

Dovitch a dit…

Merci bien

Anonyme a dit…

ya rajel 9addakech logic !
bourjoulia yalzimha tarf tagget :
elm3allam, el7akem, el9affeffa, el3ayacha, el 7aftarich, inti nakira, ECH TISKHAYEB ROU7EK, FIL EUROPE ???, tabba3 el kbir tirba7, chabab tawa, bnat tawa, rjel tawa, nsa tawa, ya 7assra, chabeb bikri, eddenia fisdet, ma famma saw, khalli barka, , ibtasem innaha tounes ... w haba haba ...

rabbi y3inkom ya chabab tawa :) w yihdi chabab bikri :(

Enregistrer un commentaire