web 2.0

vendredi 30 avril 2010

للكراء





بلوغ جميل للكراء ... جديد يلق لقان ما عندوش عامين ملي تحل ...ألوانو جميلة ..مواضيعو شيقة... الطقس فيه ديما باهي...العصافير تزقزق ...الناس إلي تجيه محترمين ياسر ..لا فيه لا عرك لا معروك لا كلام زايد لا قلة حياء ...مولاه ناس طيبة ..إنسان عاقل حدو حد روحو ...دار خدمة دار خدمة..لا عندو لا خلطة لا ناس همل تجيه ولا فساد

أهم حاجة هي موقعو الجغرافي

بلاصة موش نرمال

جاية في بلوغسفير خالي رايض لا فيه هاك الجوجمة متاع العرك والمعروك وهاك الخوضة متاع حي درابك

Il faut dire

يا حسرة على قبل

كنت تحل الشباك تلقاهم يتلاطخو ..في أنا نرا هكا ..أنا في رأيي هكا ...أنا خممت هكا

لا لا لا

معادش توا الشيء هذا الكل

نظافت الحومة

معادش منهم هاكم إلي إمخمجينها

يا خويا حتى هوما كثرولها

كانو قبل يتلمولي قدام المدونة ...ويبداو حاشاكم يعبرو وجايبين من عندهم...كل واحد يعطي في رايو لا يعرفو لا هذا صباح لا ليل لا ناس راقدة لا موش وقتو

ما أكثر حسهم...قال شنوا حرية

وإشنيا التخمام ؟؟؟ من وقتاش عنا الشيء هذا متاع التخمام؟؟؟ لا في سبرنا لا في عوايدنا الحق ...بدعة جديدة متاع قورة (ثلاثة نقاط)

لذا

السلطات ما قصرتش

لحظة... كان عمار على عين المكان

وأصبح الأمن مستتب

دنيا رايضة تعمل الكيف

تي أقرب جار محسوب في سان بيترسبورج توا


حاسيلو ...كان تلقاولي كاري نظيف، ولد عايلة...متربي ..وما عندوش هاك الفساد متاع التخمام والتعبير وإلي يقوللها حشاكم تفكير ...تفكروني

8 commentaires:

ferrrrr a dit…

خوضتها كالعادة يا دوفيتش

Dovitch a dit…

أهلا بجاري العزيز

والله خاطيني ...هوما السبب...شفت الرياض في الحومة؟؟ هه

Alé Abdalla a dit…

حانوت مسكّر و لا كرية مشومه

Dovitch a dit…

أهلا علولو

وثما إلي يقولو
الي يحشم من بنت عمو ما يجيبش صغار
:)
للأسف مازلنا ما طيرناش الحشمة

WALLADA a dit…

الكرا لا محالة في الصّيف يغلى أما أنا باش نطيّح عليك يا دوف ، أنا بلوغي واقع على ضفاف شبه الجزيرة الإيبيريّة يا عيني

Dovitch a dit…

لا نقاش مع كبار الحومة
:)

Mayday a dit…

عندي ليك كاري يعمل 66 كيف. هو الحق الحق هاو نقولك من تو... راهو عندو سوابق في التخمام و النقاش أما إتهنّّا لقى مدة عام التالي بيعة في مخّو. جاتو فرصة العمر باش يتخلّص منّو. أكاهو عاد من حينك الحق ولّى عز الناس كيف الزير المتكي لا يضحك لا يبكي العقبة ما تراو عندكم.

Dovitch a dit…

عيشك ماي داي...يكثر خيرك ومن أمثالك ..كاري من غير مخ يعمل كيف...كيما قالو ناس قبل

إرتاح الفرطاس من حكان الراس

:)

Enregistrer un commentaire