نظرية ...التحول

lundi 9 février 2009

نظرية ...التحول

بدات الحياة فوق الأرض توا يمكن 350 مليون عام
حسب الإكتشافات العلمية الأخيرة توا يمكن 7 ملاين عام هبطوا أول
primates
من فوق الشجر باش يدبكو و يسركلو فوق الأرض على ساقيهم

توا 2 مليون عام، ظهرت في إفريقيا الشرقية
Homo habilis et Homo rudolfensis
إلي هما شادين رواحهم خير على ساقيهم و إلي عندهم مخ أرزن و أكبر
هاذوما فهموا كيفاش يصقلوا الحجر و يجعلوا منو أداة يستعملوها كل يوم و أكثر من هكا قاموا يدورو و يصولو و يجولو في المنطقة -شرق إفريقيا

توا 1,5 مليون عام، ظهرو
Homo ergaster
إلي هما أنقص شعر و قادرين باش يجريو و يمكن ياسر أنهم بداو يعرفوا يتكلمو

توا 1 مليون عام، ظهرو
Homo Erectus
إلي هي خرجت من شرق إفريقيا و انتشرت في باقي إفريقيا، اوروبا، اسيا الوسطى، الهند و حتى الصين

بعدهم بميات ألف سنة -000 900- ظهرو
Homo sapiens
ديما يتنقلو، شادين رواحهم خير على ساقيهم، مخهم زاد كبر و نظامهم الإجتماعي زاد تطور
مازالوا يستعملو في الحجر أما بالشوية بالشوية ولاو يتأقلمو مع قوى الطبيعة و يحاولو يتغلبو عليها
اكتشفو النار 40000- و معاها بنة مشوى اللحم و الخضرة و هكاكة هزو شويا صحتهم و نسبة الوفيات طلعت شوية من 25 ال-30
زادو فهموا كيفاش يصنعو حواييج إتدفيهم وتحميهم من البرد

توا قرابة 160000 سنة، ظهرو
Homo sapiens sapiens
مخهم متطور أكثر، منظمين في قبائل كبيرة، عندهم طقوس و شعائر دينية، يصورو ويتفننو -30000- , يتعاطاو الزراعة و الفلاحة - 10000- ,
و أخيراً يصقلو المعادن -2800- و يكتبو -3000-

بعد إكتشاف الكتابة دخلنا في التاريخ و مفهوم الإنسان العصري
هذا إلي كون حضارات و تمكن من التكنولوجية و تعلم كيفاش يستغلها لمصلحته : صنع الكراهب و البابورات و الطيارات و حتى من الصواريخ باش يطلع ينسنس و يصقصي شفما فوق القمرة
و تنظم في مجتمعات فيها الديمقراطية والحرية و النظام و العدالة

وهنا باش نعمل قصة خفيفة باش إنركز على إطار زمني و مكاني محدد وهو شمال إفريقيا في أول القرن الواحد و العشرين

و هنا العلماء الكل قعدو باهتين...كاشخين... ماهمش فاهمين...
يا بو القلب مالا تحول قاعد صاير!!!

التحاليل الكل أكدت انو فئة من الانسان من الناحية الانتروبولوجية مخها قاعد ينشف ... يظئل حجمه... يفرغ و ينقص وزنه

أقرب الظن انو التفكير معادش موجود ... و انو النورون معادش يتجددو... وانو نظام حياتهم معادش يسمح باش يخممو ولا يقترحو ولا ينصحو ولا حتى يعملو رأي

العلماء لاحظو زادة تزايد موش نورمال في حجم اليد، إيه نعم اليد
وهنا علماء العالم الكل كلاو بعضهم في التفسيرات ماهمش متفاهمين

فيهم شكون يرى انو الحالة هذي جاية من كثرة التصفيق و التنبير و الطحين و الريق البارد إلي كانوا يتعاطوا فيه، و فيهم شكون يرى انو عندو علاقة بهزان القفة و تهبيط و تطليع السروال و فيهم حتى شكون يرى انو عندو علاقة بالتشلبيق و الكفوف إلي كانوا يتعاملوا بها لقضاء مصالحهم

خاصيات أخرى ماهياش أقل أهمية من التحولات الفيسيولوجية...وهي اللغة المستعملة
هي لغة خشبية حطبية فحمية تتركب من كلمات عادية لكنها بدون معنى
كلماتها تبعث في الجسم أحاسيس متنوعة
ساعة ساعة تلز إلى الغثيان والإزدراء، ساعة ساعة إلى الضحك والإستهتار، ساعة ساعة إلى حالة يصفها العلماء النفسيون بحالة
آ نندبهم...آ نندبهم...آ نقطع شوالقي... آ نحل عروقي

يا أيها المعنيين بالأمر،
يهديكم،
يصلح رأيكم،
يرحم والديكم،
يزيونا أخطاونا من هل ريق و ساعدو على أمخاخنا

30 commentaires:

chanfara a dit…: تحليل رائع

شكرا على المجهود و على هالضحكة

;-); 9 février 2009 à 14:12
Dovitch a dit…: شكرا شنفرة على مرورك وتشجيعك; 9 février 2009 à 14:21
عاشور الناجي a dit…: و المصيبة ان كلامك صحيح للأسف; 9 février 2009 à 14:22
WALLADA a dit…: كيف تنقش نقشات كيما هكّة و اللّه صحّة كي تكتب حتّى مرّة في الشّهر ، صحّكتني و فرهدتني و نصّك نظّفلي عينيّ من برشة كلام نقرا فيه كالظلام; 9 février 2009 à 14:30
Anonyme a dit…: Très drôle!
Je te propose de baptiser le sujet de ton analyse, avant de te faire doubler :-)
Homo Sapiens Retrogradus
Africanis Retrogradus
Quelqu'un a une autre idée??; 9 février 2009 à 14:46
Dovitch a dit…: عاشور و ولادة : مرحبا بيكم
حتى أنا إنساعد في روحي باش ما نترشقش
:))

@Nomade
Homo Sapiens Retrogradus... me semble bien représentatif... excellent :); 9 février 2009 à 14:50
Achille a dit…: هايلة منك آما فاتك الي التحّول ولا فلسفة كاملة و قريب انوليو انصدروا فيها للبلدان الشقيقة و الصديقة (;; 9 février 2009 à 14:55
عياش مالمرسى a dit…: Excellent, il y a des recherches qui ont prouvé que le plus évolué des 'homo retrogradus' est en effet 'l'homo arabicus muslimanis', observé sur les grandes plaques de l'Afrique et de l'Arabie, selon certains scientifiques, il pourrait survivre plus de 30 ans sans cerveau!!; 9 février 2009 à 18:00
ART.ticuler a dit…: برافو بوفيتش!
هذه اسمها نظرية النشوء والارتخاء.. هههه
كانك على كتابة الضاد فمة شبه قاعدة تقول إن كانت الكلمة إسم لشيء ملموس فهي تشال مثلا: نظارات، ظفيرة،ظهر.. وإذا كانت كلمة لشيء غير ملموس مثل :ضمير ،ضوء، ..فهي لا تشال..
ملاحظة: هذه القاعدة لها الكثير من الاستثناءات لكنها ليست عديمة الجدوى..; 9 février 2009 à 18:12
Anonyme a dit…: Je suggere ceci de mon cote : Homo Septius Mauvus Retrogradus اسم طويل وممكن معقد لكنو ملائم للفئة هاذي; 9 février 2009 à 18:28
Dovitch a dit…: @ART.ticuler

ريقي شاح بهاك
Editeur YAMLI
مايشكلش، وما يعطيش الضاد الصحيحة في بعض الكلمات وما لقيتش القاف بثلاثة نقاط
وزاده صحيح ما وسعتش بالي معاه

شكرا على القاعدة و على مرورك

@Ayech

زارتني البركة
صحيح زادة حتى في التخلف الديني عند بعض الناس ثمة ما يتقال; 9 février 2009 à 18:33
ART.ticuler a dit…: أنا بيدي من ضحايا يملي:-))
z تعطيك ظ
و d تعطيك ض
المشكل في رسم الهمزة أما الضاد خذات راجل ههه; 9 février 2009 à 19:29
Dovitch a dit…: :)
إيه والله صحيح
وانا نازل اليها مرة
dh
و مرة
th
وكي تزهرلي نفرح
:)) Merci pour l'info; 9 février 2009 à 19:58
Ashistic a dit…: طيارة الارتيكل
جرب السيت هذا

http://www.lexilogos.com/clavier/araby.htm; 9 février 2009 à 22:22
Dovitch a dit…: Effectivement, il résout quasiment tous mes problèmes
Je te remercie MeTaLLisTiC; 9 février 2009 à 22:29
Anonyme a dit…: المجموعة الجديدة متاع شمال إفريقيا آش اسمها بالضبط و الله لا يصيع أجر المحسنين; 9 février 2009 à 22:40
bent 3ayla a dit…: و الله فطنتنا بها الظاهرة، و الدليل العلمي بالحق هوا الارتباط بين اليد و حجم المخ. ولا عنا بالات مش يدين من كثرة التصفيق..
مش نرمال التحليل، ههه، لتوا نضحك!; 9 février 2009 à 22:54
Gouverneur de Normalland a dit…: تدوينة رائعة يا دوفيتش

برافوا

:); 10 février 2009 à 00:58
Ashistic a dit…: Ce commentaire a été supprimé par l'auteur.; 10 février 2009 à 03:11
Ashistic a dit…: pa de rien Dovitch :D; 10 février 2009 à 03:14
Dovitch a dit…: @Hallege
مجلس الادارة متاع المدونة قرر باش يسميهم
Homo Sapiens Retrogradus
ههه

@Geouverneur et Bent 3ayla
:) Merci; 10 février 2009 à 09:03
Anonyme a dit…: المخ ينشف واليد تكبر و تتحجر و القلب يموت.. تي اهم ولاو هومو فوسسيلوس , هههه..فرهدتني رغم اللي هى مأسات .. برافو دوفيتش; 10 février 2009 à 12:55
Dovitch a dit…: يعيشك خلدونة
أيا وقتاش تعمل بلوغ؟ كملتشي من التردد؟
:); 10 février 2009 à 13:07
Anonyme a dit…: دوفيتش , أنا لساني طويل أما يدي قصيرة معناتها مانيش هاي في التقنية مره عملتلك تعليق طويل في تدوينة علاش يطهرولو و معرفتش كفاش ننشر و فلت مني التعليق و تنرفزت.. تو نزيد نشوف كفاش نحل بلوغ زاده, يلزمو دراسة
يعيشك أنت; 10 février 2009 à 17:45
Anonyme a dit…: Je viens de voir la petite affiche d'Homo Sapiens Retrogradus :D
MDR; 12 février 2009 à 06:06
Anonyme a dit…: Hilarant, à en avoir mal aux abdos !!! Bravo Dovitch :D; 12 février 2009 à 11:39
Dovitch a dit…: خـمـيّـس بـانـدي
Merci bcp :)

Nomade
راهو عندك جميع الحقوق وزادا كل شيء هنا
Self-Service, alors n'hésite pas :); 12 février 2009 à 11:56
DIDON a dit…: Et ce ne sont pas les recensements et les statistiques qui vont nier ta théorie
Bravo!; 12 février 2009 à 18:26
Dovitch a dit…: Bien que les statistiques peuvent être capables de tous les miracles, j'apprécie ton commentaire; 12 février 2009 à 20:26
Anonyme a dit…: الحقيقة ما إستنّيتكش حتّى تقلّي هزّ. سجّلت و طبعت التّصويرة و لقيتلها إستعمالين (معناها زوز إستعمالات) :
1) التّلصيق على كرسي أو على باب بيرو زميل أو زميلة غلّبو على العباد الكلّ بالعوَجْ و التّخلّف
2) حطّان التّصويرة على الأُرديناتور متاع المعني أو المعنيّة بالأمر ( أمّا موزاييك باش تضمن أكثر المعلومة توصل)

:); 14 février 2009 à 05:37