حكاية الفلوس

حَمَّا و حْمِدْ زوز أصحاب يعيشو في قرية خيالية بدائية. الناس الكل فيها عايشا لا باس عليها ومُوَفِّرة إلي لازمها

حَمَّا يخدم في المَصْيِد وحْمِدْ عندو الفلاحة

كل يوم بعد الخدمة يتقابلو: حَمَّا يجيب معاه كعبات حوت... حْمِدْ يجيب الكَمْية بسباس فول و فقوس ... والشرب ديما على حْبَوْ

كي يشتهي حَمَّا ياكل شوية لحم، يهز معاه كعبات حوت ويتبادل مع حْمِدْ وياخو من عندو علوش ولا بقرة
كيف كيف الناس الكل في القرية هكا عايشين إلي يستحق حاجة يتبادل مع الأخر


تعدات الأيام وعَرِّس حَمَّا
نهار من نهارات، هو خارج كي عادتو هازز معاه كعيبات قاروص وماشي يقعد مع أصحابو، شدتو مرتو

أسمع إنقلك...راهو معادش إيساعدني إلي تعمل فيه
أشنوة زادة...باش نرجعو لهاك المعبوكة متاع الشرب
لا لا ...صاحبك حمد راهو نهار الكل يْبَلْفِط فيك...توا علوش بربي هذا إلي عاطي هولك البارح...توا كيما كعبة المناني إلي عطيتهالو كيما علوش الحليب إلي بدل لك بيه حتى عصباًن ما نجمتش نعملو
باهي باهي ...توا نتفاهم معاه

من نهارتها حَمَّا وحْمِدْ وزادة كل سكان القرية فهمو إلي يلزمهم يشوفو حل باهي وعادل باش تكون مبادلاتهم مقبولة

تْلَمُّو أهل القرية الكل ضربو اخماسهم في أسداسهم ومن بعد جاتهم فكرة المعادن والذهب بصفة خاصة
علاش الذهب؟ لأن الناس الكل تموت عليه وموافقة عليه وزادة ينجمو يقسموه على قطعات صغيرة باش التبادل التجاري يكون آفِينْ: علوش كبير يساوي 50 ذهب وعلوش حليب يساوي 30 ذهب وانتي ماشي

حَمَّا فرحان شايخ بهذا الحل على خاطر باش يولي مُدَّخِرْ والحوت إلي كان يْلوِّحْ فيه وكان يِفْسِدْلُو ، من اليوم باش يْبَدّلُو ذهب ووقت إلي يضهرلو يشري حاجة أخرى

هذاك علاش حَمَّا جاء لمرتو وقالها: عزيزتي آشنوة رأيك نعاودو نمشيوو لي الجنوب راس و رْوَيِّسْ ونعاودو هاك الأيمات متاع شهر العسل
فرحت وقالتلو : نعن بو زينك كي تْدِزْ فازتك وتخمم فينا
حَمَّا تفكر حكايات أخرى، المرا توَّا يلزمها مصروف شوبينغ وقضيات على الأقل 17 شْكايِر ذهب والثنية كلها فصايل خلايق سراق وقطاع الطرق...رِيسْك و تعب كبير


ديراكت خمم في واحد في القرية يقولولوا البنكاجي

سي البنكاجي قالوا خلِّي عندي ذهبك في الحفض والأمان وأقصد ربي مِتْهِنّي...هاو وريقة اسمها وصل كي توصل لي الجنوب امشي لواحد إسمو عم صالح ... وريه الوريقة آتَوْ يعطيك غادي ذهبك

عِجْبتّو حَمَّا الفكرة ومشى مع مرتو لي الجنوب
في الثنية قالوا أيا ناقفو ناكلو حْوِيجة ونْريْحُو فخّارْ ربِّي
كي جاء باش يْخَلِّص آش إستهلك، فْهِمْ حَمَّا إلي الوَصْل (رغم انو يمثل برشة ذهب) ما يساوي شيء بالنسبة لصاحب المطعم على خاطرو ما يعرفش لا البنكاجي لا عم صالح لا مستانس يرجع باقي على وصل

ستر ربي فوقو شوية صَرْف ذهب خلِّصْ بهم وكمِّل الرحلة متاعو

كي رجع حَمَّا لقريتو، لَمّْ أصحابو أهل القرية والمسؤولين الكبار وإقترح عليهم الفكرة هذي:

علاش ما نحطوش الناس الكل ذهبنا في بلاصة وحدة نسميوها البنك المركزي وفي المقابل كل واحد ياخو ورقات نقدية تمثل مكسوبو من الذهب في البنك إلي ناثقو فيه كلنا
الناس الكل عجبتهم فكرة تبادل الأوراق النقدية إلي تسهللهم مأمورياتهم وتخفف عليهم تبادلاتهم ... وقاموا بطبع أوراق نقدية فيها رموز القرية وأحداث تاريخية وحتى من رسائل سرية ذات معاني معبرة

بالطبيعة أحداث القصة ما وفاتش خاطر مفهوم العملة زاد تطور واليوم كل عملة تتقاس موش كان على الذهب أما زادة على عملات أخرى كما الدولار ولا الأورو. يسامحوني أهل الإختصاص على التبسيطات لكنها محاولة مني باش نفهم شوية من تاريخ العملة وحكاية الذهب في البنوك إلي كنت نراها في الأفلام وأنا صغير