web 2.0

samedi 2 mai 2009

إشهار و ألمان


وانا انبحر عل الواب كيما يقولوا، استوقفتني بوبلسيتي متاع ماركة متاع حوائج داخلية في ألمانيا

تصويرة فيها انجلا ماركل المستشار الألمانية لابسة من غير هدوم هي وأعضاء حكومتها


إستعمالي لكلمة من غير هدوم ما هياش حكاية أخلاق حميدة ولا إستنكار بالعكس ما عندي حتى مشكلة حتى كان صوروها في زي حواء كما يقول القورة

لي خلاني نكتب هل كلمتين هما التساؤلات إلي تعداو بمخي في اللحظة هذيك

أولا وبعد عبارات الاستعجاب البسيطة من نوع
آبـابـابـابـابْ مقواهم الألمان

قلت الزح كيفاش خِدْموها التصويرة وكيفاش تم تناوله الموضوع الحساس هذا

راهو ولد صغير مازال كي تْخَرِّجْ، صورها في الأردنتور ومن بعد يمشي لعرفو... راجل كبير عادة ... ويحاول ياخذ رايو

باهي هكا عرفي صْدِرْها المْعلّمَة؟

لا لا عيش ولدي زيد كَبِّرْ شوية .... نعرف بدنها ماهوش طيارة أما ما فيها باس زيد اخدمها شوية التصويرة

لله يبارك عرفي (بالألمان بالطبيعة الحكاية صايرة

وهذا عرفي؟... وزير الخارجية؟ سا فا ؟
وزير الخارجية؟؟ (يزيد يثبت في هاك البلاصة) ميسالش هكا يزي فيه البركة... باهي
و وزير الإعلام؟ وزير الإعلام ... عيش ولدي زيد كبرلو وطولو شووويا...هذاك متاعنا

الحق حسدتهم...موش في بدناتهم ولا في جمال التصويرة إلي على فكرة تنجم تعجب ولا ما تعجبش...أما على الحرية إلي يتمتعو بها وتخليهم يجسمو أفكراهم من غير قيود ...حسدتهم في مستوى الوعي الذي إرتقى له شعبهم في ظل القيادة الرائدة والحكيمة لمستشاريهم...حسدتهم في حرية التفكير والتعبير والخلق والإبداع إلي تخليهم يتطرقو لكل المواضيع من غير

لا عمار
لا بو مقص
لا بو فردة
لا مضايقات
لا تهديدات
لا نبزيات
لا بنتووات

في الأخر، لا يملك المرء إلا أن يقول

آبـابـابـابـابْ مقواهم الألمان

11 commentaires:

لاعب النرد a dit…

يعطيك الصحة دوفيتش في ها الكليمتين...أبسط حاجة تنجم تبين الفرق مابينا و ما بين الاخرين ..الالمان و الفرنسيس و الامريكان وغيرهم...المشكل انه احنا قاعدين راجعين لتالي يظهرلي...ـ

بـانـدي...خـمـيّـس بـانـدي a dit…

يـا دوفـيـتـش يـا خـويـا و يـا لاعـب الـنـرد يـا بـاهـي... سـيّـب عـلـيـكـم ڤـلّـوا ألـمـان ، هـاذوكـم كـفّـار زنـاديـق ! يـاخـي مـا فـي عـلـمـكـمـش الـلّـي أحـنـا إكـتـشـفـنـا الأشـعّـة الـبـنـفـسـجـيّـة و الأشـعّـة تـحـت الـحـمـراء تـوّا 14 قـرن الـتـالـي... رانـا قـوّة و حـضـارة و تـاريـخ... غـيـر سـاكـتـيـن و بـرّه...

tunisianblogger a dit…

برجوليّة تصوّروا نفس الفازة في تونس شنوة تعطي؟؟!! نعرف اللّي يوصل يخّمم فيها راسو يطير اما تصوّروها: الزّين واقف (شوية ڨازون بالطبيعة و "قلصون" سينيا...) وراءه المُفتي عِريان زْڨَطْ ولابس الكشطة، بعدوا "المْبَزّعْ" متاع مجلس النّواب فالغنّوشي الوزير الاوّل.... والله لا يفضح مؤمن وبرّه ههههههههه

Dovitch a dit…

@tunisianblogger
الفكرة متاعك كي جيت نتصور فيها نلقى روحي نتلفت ورايا في حركة لا إرادية ونخمم في أهلي واماليا هه
هذاك الكل والديكور متاعك يتسمى لايت لا فيه لا زيتون ولا هندي ههه

Clandestino a dit…

احنا خير من الالمان ..
احنا على القليلة اش اسمها كس يصوروها ببيكيني ممكن برشة تطلع ساكسي على انجيلا ماركال
هاذية حقيقة منجموش ننكروها

Dovitch a dit…

لاعب النرد
عيشك أما موش ظاهرلي...للأسف أنا متأكد اننا قاعدين راجعين لتالي.
اتمنى ان نكون قد لمسنا القاع و قريبا نبدأ رحلة الصعود


أقوى باندي
معادش باش اندور بيهم هل كـفّـار الزنـاديـق... واقعهم يحمملي قلبي

كلندو
احنا خير من الالمان... لا شك في ذلك خويا
احنا ساكسي أكثر... لا نهار شكيت في هذا زادة

ونجمو نهزو
البطولة... من غير شك
:)

alopex a dit…

الزححححح بديت نمن بعدد 7 ومفعولو السحري شفتو مرتبة الفريق الأحمر؟

Dovitch a dit…

alopex
أهلا بيك
ايي نعم يا خويا،أهوكا نعيشو ونتعلمو مع السابع
شكرا على مرورك

عياش مالمرسى a dit…

حتانا كي شفتها لحكاية تنهدت و طبست راصي، احنا من غير لا تجبد عمار و الدولة، لعباد بيدهم تويبداو يصيحو أخلااااااااق و عفّففففففففة و ستر و كيفاش يجي العرا

Pure a dit…

هذه هي الديمقراطية ولا بلاش

Dovitch a dit…

عياش
عندك حق... ما أمر من الصنصرة متاع عمار كان الأوتو صنصرة معناتها الرقابة الذاتية والتخوف من ردة الفعل متاع العباد وتعليقاتهم وتهجماتهم ساعة ساعة
كيما يقول عاشور... زايد بالحرام زايد :)
أما.. ما نجمو كان انواصلو الجهاد في سبيل الحريات نقصد التعبير والتعبير والتعبير والتكعرير

مرسي عل الطلة


Pure

نورتي المحل... يسرني مرورك وتجاوبك مع تدوينة باللهجة التونسية

Enregistrer un commentaire