الباب إلي يهز للبحر

كان قاعد يتفرج في البرنامج الديني على القناة الفضائية كي شدتو الكريز.... كريز متاع ضحك ومن بعد بكاء
أهلو ما فِهْموش إلي بيه....وقعدو حايرين عليه
لا وِعْدة حاكت فيه
لا وْلِيّ رْضَى عليه
لا عراف فْهِم إلي بيه
لا حبة سوداء نجمت تشفيه
ولاو هزوه للطبيب إلي ينجم يداويه

قلو تعاني من تلوث...تلوث في المخ من إلي تستهلك فيه...أفكار ظلامية مُعَلّبة وفات صلوحيتها.... آراء رجعية فاسدة ما تصلحش ...أوهام بالية تعملك الدوخة ..عادات فاسدة تتراكم آثارها على بدنك

عليك بالتخمام

أول حاجة عملها بدأ بالتخمام على الخواء
التخمام في بيت النوم...في التواليت... قدام التلفزة

كان ساعات كي تواتي يعمل كعبات...التخمام ما ينجموش...ولا يقلقو... يِتْحَيّر عليه...يِمْكْنو...ويِخَليه يِهَلْوس ويُخرج من عقلو...يولي خايف وحاسس بالذنب

يرجعلو القلق الدائم من الفجوة إلي ما توفاش بين إلي يحب يعملو وإلي شيوخ القنوات نهروه من فعلو

يولي يرى في الحفرة الغارقة بين نظرتو للحياة حسب أخلاقو وتربيتو ونظرة دعاة الدين وأصحاب السلف حسب فهمهم وثقافتهم

الهفهوف بين حبو للحياة ورغبتو في العيش وبين طريقة العيش الموصوفة في نصوص وأقاويل من العهود القديمة


الدنيا تظلام عليه
راسو يولي يوجع فيه
النفس يضيق بيه
الهواء يتقطع عليه
حْمِلْ رْزين يِحسّ فيه على كْرايْمُو
بدنو معادش انجم
يحب ينحي الحمل
يِهَبّط إلّي مْرَزّنو
ويطير
يهرب لبعيد
يتنفس هواء نظيف
يشوف سماء صافية
بحر زيت
نسمة مفرشكة
ناس زاهية
شمس ضاوية
يحل باب كبير
وتتحل قدامو ثنية
تهزو وين ثما البحر