web 2.0

mardi 28 juillet 2009

مع سي نويرة


هذي خدمة العمر... بوسط طيارة...شهرية فاوحة... مستقبل واعد... مسؤولية كبيرة... ما يلزمنيش إن فلتها

الأنترتيان نهار الخميس مع المدير سي نويرة... قالوا عجبو السا.فاي متاعي... يحب يقابلني ومن بعد يقرر... معقول... يلزمني نحضر روحي مليح... نفهم المطلوب ...نركز على البوزوان ونحاول نخلي البروفيل متاعي يتماشى مع متطلبات الوظيفة... يلزمني نكون في المستوى

نهار الخميس جاء
نلبس كسوة وكرافات... شعري بالجال...شوية بارفام... نثبت روحي في المرايا... نزيد نستوي شعري... نزيد نكبس ربطة الكرافات... مالله وهرة يا دوفيتش...الأمور في العنبر... نقصد ربي



عالسلامة سي نويرة
تفضل تفضل
يحكيلي شوية سي نويرة على المؤسسة وخاصيات الخدمة
نسمعو مليح و ساعة ساعة:بالطبيعة سي نويرة... إيه نعم... الله يبارك سي نويرة... موافق... انشالله نكون عند حسن الظن...سي نويرة راني نمن بقيمة العمل... الثقة في رأيي ما تتعطاش... يلزمني نستحقها...نطلب منك حويجة وحده اعطيني الفرصة باش نستحق ثقتك...برشا حاجات في الخدمة هذي نعرفهم، نتقنهم ونقدهم مليح...وثمة حاجات مستعد نتعلمهم، نقرا عليهم باش نتحسن فيهم...الخدمة عجبتني برشا...تتماشى مع ميولاتي، التقنيات إلي نتقنهم والحاجات إلي نحب نخدمهم
النشاط متاع المؤسسة يتناسب مع طموحاتي وراني مستعد ومتحمس للمشاركة بكل مجهوداتي وقدراتي في تطوير مشاريعكم والدفاع عن مصالح المؤسسة

باهي يعطيك الصحة

ياقف سي نويرة... ناقف معاه... يوصلني للباب ويمدلي يدو باش يصافحني
شكرا اتو نتصلو بيك عن قريب

ابتسم كمجاملة: شكرا سي نويرة

حويجة أخيرة: نويرة راهو إسم الشارع متاع المؤسسة...إسمي الجيلاني

4 commentaires:

Téméraire a dit…

ey tawa nkoulou mabrouk el khedma ejdida walla lé ?

Dovitch a dit…

Téméraire V5.0

مرحبا بيك... في التدوينة هذي حبيت نجرب نعمل محاولة في سرد رواية على لسان الراوي معناها بإستعمال ضمير الأنا
القصة كلها من وحي الخيال و الأسامي مستعارة بالطبيعة
:)

Téméraire a dit…

bel essai en tout cas.

Dovitch a dit…

Merci Téméraire

Enregistrer un commentaire