مع سي نويرة

هذي خدمة العمر... بوسط طيارة...شهرية فاوحة... مستقبل واعد... مسؤولية كبيرة... ما يلزمنيش إن فلتها

الأنترتيان نهار الخميس مع المدير سي نويرة... قالوا عجبو السا.فاي متاعي... يحب يقابلني ومن بعد يقرر... معقول... يلزمني نحضر روحي مليح... نفهم المطلوب ...نركز على البوزوان ونحاول نخلي البروفيل متاعي يتماشى مع متطلبات الوظيفة... يلزمني نكون في المستوى

نهار الخميس جاء
نلبس كسوة وكرافات... شعري بالجال...شوية بارفام... نثبت روحي في المرايا... نزيد نستوي شعري... نزيد نكبس ربطة الكرافات... مالله وهرة يا دوفيتش...الأمور في العنبر... نقصد ربي



عالسلامة سي نويرة
تفضل تفضل
يحكيلي شوية سي نويرة على المؤسسة وخاصيات الخدمة
نسمعو مليح و ساعة ساعة:بالطبيعة سي نويرة... إيه نعم... الله يبارك سي نويرة... موافق... انشالله نكون عند حسن الظن...سي نويرة راني نمن بقيمة العمل... الثقة في رأيي ما تتعطاش... يلزمني نستحقها...نطلب منك حويجة وحده اعطيني الفرصة باش نستحق ثقتك...برشا حاجات في الخدمة هذي نعرفهم، نتقنهم ونقدهم مليح...وثمة حاجات مستعد نتعلمهم، نقرا عليهم باش نتحسن فيهم...الخدمة عجبتني برشا...تتماشى مع ميولاتي، التقنيات إلي نتقنهم والحاجات إلي نحب نخدمهم
النشاط متاع المؤسسة يتناسب مع طموحاتي وراني مستعد ومتحمس للمشاركة بكل مجهوداتي وقدراتي في تطوير مشاريعكم والدفاع عن مصالح المؤسسة

باهي يعطيك الصحة

ياقف سي نويرة... ناقف معاه... يوصلني للباب ويمدلي يدو باش يصافحني
شكرا اتو نتصلو بيك عن قريب

ابتسم كمجاملة: شكرا سي نويرة

حويجة أخيرة: نويرة راهو إسم الشارع متاع المؤسسة...إسمي الجيلاني

في قرية السنافر : إنتخابات

كان يا ما كان في حديث الزمان وحاضر العصر والاوان
قرية خيالية محاطة بالبحار وتملؤها الأنهار والوديان
تحاول أن تعيش فيها سنافر بسلام و أمان
رغم تضاؤل الآمال في وجود حرية وحقوق للإنسان


في يوم من الأيام
شهيلي و خلاء وقيفار
لا نسمة ولا حس أطيار

بابا سنفور خرج يعمل في طلة ويستفسر الأجواء في القرية


غريبة؟؟؟
آهو دار السنفورة مدهونة بالقزوردي


يزيد يقدم شوية

الكوشة
الفطايري
العطار
الحماص
...يا والله أحوال ...شكون عمل هل عملة ؟؟؟

ويزيد يمشي شوية



يشوف في سنفور قزوردي، فوشا وحكا دهن في يده، شايخ يغني...


يسلم عليك العقل
براريم براريم
يسلم عليك العقل و يقولك نبيك
براريم




يجري بابا سنفور وبكل جواجيه

ياااا ولدي ياااا ولدي ....فاش قاعد تعمل؟ (بالطبيعة بابا سنفور ما يقولش كلام قباحة)
ما تعرفش إلي قانون القرية يمنع الدهينة وزيد بها اللون الماسط ؟ ياخي القرية مسيبة هكا في الهواء الطلق تقوم و تطلع بعملة كيف هذي؟ ما تعرفش إلي يلزمك رخص باش تقوم تدهن في الديار وتلصق في تصاور فوق المحلات؟؟ ويني رخصة البلدية ... ويني رخصة المالية والباتيندة ورقم الإنخراط في السنسس...ويني رخصة الثقافة على خاطر القرية من التراث العالمي ... ويني رخصة وزارة الاعلام راك محسوب تدبر في راسك وثمة شوية مرشانا ؟؟؟؟
يا ولدي راهو مباصي الشيء إلي تعمل فيه ... باش نعملولك قضية في التجمهر في الطريق العام
التطاول على السلطة
ترويج أخبار كاذبة
تكوين جمعية غير مرخص لها
الإستحواذ على أموال عمومية
عربدة وسكر واضح في الطريق العام

بالفجعة هاك السنفور القزوردي ولا لونو أصفر...عينيه تملات بالدموع...عمرو ما شاف بابا سنفور في هل حالة

وتلمت السنافر اش قلك؟ آش قتلك؟ بابا سنفور باش يباصي السنفور القزوردي ويدكو في الحبس.



من كثرة الغصرة نطق السنفور القزوردي بصوت مبحاح
تي شبيك بابا سنفور... راهي
قريتنا تستعد للإحتفال بالإنتخابات الرئاسية المقبلة لتكون قريتنا العهد الجديد في احتفاء دائم بتاريخها متطلعة الى المستقبل بطموح كبير الى استكمال فصول الملحمة التي غدت منذ التحول أمرا واقعا وحلما مشروعا بفضل حكمة الرئيس بن علي في قراءة التاريخ واستشراف المستقبل والوعي برهانات المرحلة وتحدياتها ومقتضيات العمل على تدعيم مسارات النجاح.



ما كان من بابا سنفور كان ما رجعلو شاهد العقل وراجع موقفو كسنفور عندو صغيرات ويحب يكبرهم


آه والله نسيت جملة...يا سنفور ما ثمة حتى مشكلة وراهو القانون صريح في الموضوع هذا
واحنا بالعكس نشجعوك تنجم تدهن على روحك... واحنا إنحبو الدهانة... ويا ريت السنافر الكل تدهن كيفك...ويا ريت الناس الكل تتغرم بالدهينة كيفك... راهو احنا نشجعو مثل هذه المبادرات الفردية إلي فيها منفعة مباشرة لكل المواطنين وتساهم في الحفاظ على البيئة وحماية المحيط وطبقة الأوزون والكواكب الشمسية...و-دايور- هاو مفاتح داري تنجم تمشي وتدهن من البرة ومن الداخل كان تحب ... أنشط على روحك يا سنفور...وكان تستحق أي حاجة آني معاك




بما أن الحكايات في عالم الخرافات ما تنتهي كان بالشيخات

فقد قامت الزغاريط والتصافيق والهتافات
وشعلت الأنوار والأنبوبات والأضواء
وخرجت المشروبات والعصيرات والروزاتات
وتدهنت الديار والبيبان والمحلات
وهبطت الطبالة والزكارة والبندارة
ونادت الهتافات بالولاء والوفاء لرجل الإصلاح والبناء

في القايلة

الأولى تعمل كيف
الثانية كيف كيف
الثالثة بدات تخطف
الرابعة تزهى وتشيخ
الخامسة ماخذة بالخاطر
السادسة يكثر فيها الحديث
السابعة ما أحلاها الحياة
الثامنة ما قال حد لحد
التاسعة كان باش نزيد تولي وحلة
العاشرة نمشي على روحي وغدوة نعاود من جديد

الجهاد الفايسبوكي

استجابة لنداء الطمبرو...هاو باش نكتب سطر واحد أعبر فيه عن موقفي المساند لكل حملة على فايسبوك ضد البهامة والتخلف

فيديو كليب: هدية لعمار

رغم قرصنة موقع الفايسبوك الحملة متواصلة ضد الحجب والقمع ومن أجل الحريات

AMMAR M'A TUER

Si l'on ne croit pas à la liberté d'expression pour les gens qu'on méprise, on n'y croit pas du tout.
[Noam Chomsky]


Toute censure est stupide par essence puisqu'elle qualifie, précise, décuple les élans de la révolution qui la fera sauter.
[Jean-Marie Poupart]

C'est le propre de la censure violente d'accréditer les opinions qu'elle attaque.
[Voltaire]

Louer ou censurer ce que tu ne comprends pas peut causer préjudice.
[Léonard de Vinci]

Je m'inquiète pour le jour où, dans 10 ou 15 ans, ma fille me demandera : "Papa, tu faisais quoi quand ils ont censuré la liberté de la presse sur Internet ?"
[Mike Godwin]

عمار...دائما على شاشاتنا

فيلم ماسط ومتواصل

حريات...حريات...مع تطور التقنيات

مع تطور التقنيات باش يولي كل إنسان ينجم يكون في إتصال من كل بقعة بشبكات المعلومات

اليوم أردنتورات وبورتبلوات وغدوة تلافز، مناقل، خواتم مرايتات وأجهزة الكترونية من كل نوع تسمح للمواطن باش يتحصل على المعرفة من كل بلاصة

الأخبار من كل بلاصة، الجرائد باش تولي افتراضية، المعلومات فيها فورية وعلى قياس وذوق كل قارئ. الجرائد الصفراء وبودورو باش تنقرض عن قريب

البلوقات زادة باش تتطور والمحتوى متاعها باش يتنوع (تفاعل أكثر، فيديوات ومحتوى 3 أبعاد عن قريب) لكن تقعد تعطي وجهات نظر شخصية للمواضيع المطروحة. تأثيرها زادة باش يكبر في مجتمعنا وما نتستغربش تولي صانعة الرأي العام التونسي

الشبكات الإجتماعية كي فايسبوك، تويتر... مازال عندهم ما يقولوا لتبادل المعلومات و ترويج حرية التعبير: إتصال دائم بالأصحاب والأصدقاء, تبادل الرسائل الفورية و الملفات, التفاعل مع الأحداث، ألخ

بخلاصة انترنات في كل بلاصة, عالم افتراضي من كل جهة
وتوفر المعلومات باش يكون من كل بقعة
انترنات ماشية وتولي جزء لا يتجزأ من حياتنا ...ماعادش نستغناو على خدماتها
كيما زادة معادش حتى شيء ينجم يتخبى



لذا من واجبنا ناقفو ضد كل الانتهاكات إلي نتعرضولها اليوم في هذا المجال ومن أهمها الصنصرة


نضم صوتي لبرشا أصوات ارتفعت باش نزيد نقول لعمار

تقنية المعلومات ولات شرطاً لا غنى عنه لكل بلاد تحب تخلط على ركب الدول المتطورة
يزي فك سيب الشعب يواكب كافة الأحداث والابتكارات والاختراعات في مجال تقنية المعلومات
خلي الناس تسرفي بحرية في مواقع كيما دايليموشن، يوتيوب والمدونات وكل المواقع إلي ما ثماش علاش تكون محجوبة
حرية التعبير راهي دعوة إلى الخلق والإبداع والرقي والنمو والتطور
هي حق من أبسط حقوق المواطن و منها إحساس بالكرامة والشرف
راهو زايد إلي تعمل فيه ولا فائدة منو
الصنصرة تضر في سمعة البلاد وما تخدمهاش

راهي معركة الحرية يستحيل تربحها انتي
وسينتصر فيها الشعب حتما ويسقط فيها الطغاة

لا للصنصرة : كاريكاتور

ابحث عن التشابه بين وضعية الأنترنات في تونس ووضعية هذه التلفزة

لا للحجب : لا تربحك يا عمار

لا لحجب المواقع
لا لمصادرة الحريات
لا لقمع الآراء
لا لمنع الإبداع
لا لثقافة الخوف
لا للظلم والإستبداد
لا للنظام البوليسي